[bouncer]up緊,就快得

發表失敗
發表失敗
原因: 確定
綠茶_君 31日
這是一部有關「毅進仔」既夢幻搞笑愛情故事,希望帶比大家歡樂、正能量和夢想。(p.s. 本故事純屬虛構)

「毅進仔」竟然和女明星談戀愛 第一章

跟自己鍾意既偶像談戀愛,係每一個粉絲既夢想。但我並唔係她的粉絲,更不認為這是一種奢望,因為緣份係講唔埋既......

炎炎既夏日,從某校園的天台眺望著香港特有既景色,那就是一棟棟茂密得像針一樣插在地上的高樓大廈,其實也沒什麼景色可言,只是年輕人嘛,所以要裝帥。有個年輕人個朵叫莫少軒,人稱Green少,今年27歲,係來自一個小康家庭,講唔上叫有錢人,但有個親戚係新界某條村既村長,而且有頭面。屋企有車有樓,返工只會按自己的喜好和心情,一年前辭去原來的職務,報讀了某社區書院的毅進課程,修讀創新科技及3D打印,重返校園生活,希望順便upgrade下自己咁話喎。這位Green少表面廢青look,但實質佢係位勤力小子,平日唔聲唔聲,一出聲就嚇你一驚。點解我會咁講?因為一個廢青look既人竟然考試科科高分,主動幫同學補習溫書,重要校際才藝比賽上台表演音樂,實在令人意想不到。

Green少為人低調,甚少向同學提起在外面既事。
從來無人知道他以前做過什麼職業或者由來,雖然他成日話自己係窮學生,但談吐間依然散發出一種「公子味」,言行舉止間都feel到佢既優雅。佢整日在上課既時候睇女,更喜歡向身邊既同學分享那些網絡上的美女,又喜歡四處聊女同學談天說地。但可能佢平日熱心助人,為人疏爽,因此同學們都不抗拒他。

講咗咁耐,你哋係咪以為我會用第三人稱去講呢個故仔呢?錯啦!其實我係兜個圈讚自己咋!追女喎...... 梗係要自己親力親為啦!

那天正在上數學課的時候,旁邊的女同學不耐煩地說:「喂!你又係度睇女啊!今次又邊個呀?」

我旁邊既女同學是我班既女班長,年紀比我大14年,已為人妻,係入讀這間學校時,第一位認識的同學,更是我認定的「真朋友」- 磚同學。個名係怪,但佢係咁樣稱呼自己,我哋人人都係咁叫佢。

我:「我睇緊東東西望個Mandy呀!對腳又長,腰又幼,皮膚又白,一個字 - 正!」
綠茶_君 31日
有用開Instagram既男性朋友都知,ig簡直就係網絡上既酒池肉林,而我地男仔就係現代既秦王,鍾意睇邊個就睇邊個。天性風流既我越講越興奮,用手擦著手機螢幕,不停在Mandy既Instagram相片上下掃動,冒求把自己看到的美女分享給女班長欣賞。點知佢黑起塊面,成個龍珠比達咁款。此刻我心知不妙......

磚同學:「妖,聽書啦!聽日測驗啦!成日掛住睇啲姐仔(女藝人),睇到都追唔到啦...... 咪發夢啦! 」

我反起白眼,心裏既無奈可說是筆墨難以形容,此時此刻我只想不顧一切地舉起那根陪伴了我27年的中指去表達內心深處既感受。可是理性卻蓋過了我的任性,因為作為一個受過高等教育的人是不能如此無禮的,而且更會傷害了彼此間的友誼。於是我張大眼睛,深呼吸,保持著一副溫文爾雅和微笑的臉孔,用十分有素養的態度回答。

我:「係既係既。」

然後依依不捨地按著返回鍵,準備離開女神Mandy的ig。帶著千萬個不願意快速地按著返回鍵回到ig的主頁,打算離開ig這個邪惡的溫柔鄉。剎那間隱約地在電話的螢幕裏出現了一個M字頭的英文名稱,下面上載了一張女性的自拍相,相片中主角洩漏出一絲陽光的仙氣,但感覺陌生。我的心突然不依節奏地跳動了幾下,然而...... 由於我平日既刻苦鍛鍊,因此我既右手比左手既速快三倍,所以在連續極速按下返回鍵的情況下,畫面退出了ig。

剛好小休時間到了,老師說大家可以休息一下。於是喜歡看電影的我就戲劇性地跑到天台上,呼吸一下新鮮既空氣,調整一下自己既情緒,順便裝一下帥。

我:「唉...... 想看睇下女都唔得,你估我真係黎讀書咩,想識女仔咋!」我低著頭喃喃自語咁係度抱怨。

被剛才的那股仙氣影響,腦海裏充斥著揮之不去的幻象,一直思索著到底剛才那個女仔是誰。閱女無數的我又怎會有我不知道的美女存在呢!

不忿的我立刻再次登入ig,決意搜尋著「陽光仙氣」的下落。可是無論我怎樣試怎樣也,在我的手機裏、腦海美女的字典裏都是找尋不到「陽光仙氣」的踪跡。

放學回家後的我寢食難安,彷彿快要窒息一樣,就連習慣每日練習樂器和砌模型的例事也沒做。

「這到底是什麼一回事?」我苦惱地凝視著自己雙手。

作為一名音樂天才和模型製作天才,自己憑著過人的天賦和努力,在無師自通的情況下也能獲得演奏級及專業級資格,每天的定時練習居然是為一張女生自拍照而停止?我反覆思量著。

在Google搜尋器上打上Keyword:「香港美女」、「仙氣美女」等等字眼,縱使是花幾個小時也找尋不到那張自拍照的下落。

不敵睡魔的侵襲,我在電腦前睡著了。客廳的電視剛好播放著深夜娛樂節目,一名女藝人參加了昨日的新世界維港泳......
綠茶_君 31日
第二天早上,晨光從窗櫺中滲透出來,令沉睡中的我緩緩地醒過來。真的是這樣嗎?你就想呀!邊有咁優雅啊...... 你估寫小說咩?係電話係度響呀!

突如其來的電話鈴聲,嚇得我心都離一離。雖然個鈴聲音樂係自己錄既音樂作品,但早上睡醒過來的一刻是男生最脆弱和意識最容易被受入侵既時候。我用手搓搓胸口,揉揉眼睛,望一望先知原來係磚同學打黎。

我:「喂...... 早晨,點啊?」有如夢囈語般的聲調。

磚同學:「喂,你睇女睇到懵咗呀!而家幾點啊?今日數學測驗啊,十點半就開波啦!」

我望一望電腦螢幕個鐘,時間顯示為九點三十五分,於是見慣大埸面既我當然淡淡定有錢淨。跟磚同學掛線後,我立刻梳洗自己俊俏既臉孔,然後穿上平凡的襯衫準備出門。

向來型開既我,返學從不帶書本,只會帶文房三寶 - 電話、銀包、鎖匙。由於今天遲了起床,因此不能低調地坐公共交通工具上學了。我只好提著車匙開著那部早前買的限量版開蓬車,轟響著引擎從西貢出發到九龍去,在距離學校較遠的兩條街泊好在停車場,然後再走路上學。點解要咁辛苦?就係唔想比其他同學見到自己的另一面。

準時回到學校,完成老師安排的測驗。磚同學一臉憂愁喃喃自語。

磚同學:「唉...... 又唔合格了。」

我:「咪咁啦,希望在明天啊嘛!」

磚同學無視著我的說話,無聊地擦著手機。一會兒,她拍拍我肩膀。

磚同學:「喂,你昨日有冇睇娛樂新聞啊?衛芝雅參加維港泳呀,由尖沙咀游去灣仔啊!」

我:「衛芝雅?邊個黎架?」

磚同學:「衛芝雅你都唔知邊個?重話自己閱女無數。」

我搖搖頭,攤開手,擺出一副不在乎的樣子。

磚同學一手把電話遞到我的面前。「呢...... 咪呢個囉!」

視線落在她的手機畫面上,我心裏不禁一揪,突然又不依節奏地跳動了幾下。就是這種感覺...... 就是這種感覺...... 就是她了...... 那個令我昨天寢食難安的女子,原來就是她...... 衛芝雅。 待續......

故事將會不定時更新。
綠茶_君 31日
「毅進仔」竟然和女明星談戀愛 第二章

愛和喜歡是兩件事,男人可以風流,但絕不可下流。

大費周章搞咗一大輪,終於在女班長 - 磚同學的口中得知個女仔叫「衛芝雅」。此時此刻的我看到磚同學既頭上,頂著一個圓形的光環,有如神明一般救贖了我的心靈,為我排疑解難。

我拎著磚同學部電話起勢咁擦,在芒果動新聞的報道裏一邊欣賞衛芝雅穿著泳衣與其他泳手既合照相,一邊咀嚼著報導既文字內容。雖然未見過衛芝雅真人,但從報導的字裡行間中,我feel到這個女子係充滿著陽光氣息,而且個人應該都幾好傾,重點係佢個款其實有點似我以前個中學同學......

講起中學都已經成十年前了,還記得我是2009年舊會考制度既學生,當時年僅17歲熱血到爆燈既我成日想去做警察,諗住打擊罪惡,撲滅罪行咁話。可能睇得多三色台既警匪片,以為做警察好似做麥記咁容易,有手有腳就做得。點知後來從警察招募廣告得知原來都要有五科pass先有得見工,所以就byebye了。

捨棄了讀書,一心想拯救社會既我,即使胸懷大志,最終都只能被萬惡既會考困住而止步。社會失去了我的守護,香港人你們只能自求多福吧!

後來幾年我捨棄咗打擊罪惡,跟我個村長公公學收租,兼轉行做埋文青,向寫作、模型和音樂行業發展,出版過三本小說,教授過不少模型和音樂學徒,成績都ok唔錯,雖然講唔上出名,但在行內算是公認的高手。年紀輕輕既我確實已經有啲成績(對比同年的朋友),比人讚兩句人就梗係有啲飄。不過早熟既我無因此而驕傲,反而更踏實地做人。
型男夏日必著潮牌白TEE
Stussy 純棉針織 Logo Tee 六折 HK$245 +免運費!
www.mrporter.com
贊助網站
綠茶_君 31日
我拍過好幾次拖,雖然講唔上叫經驗豐富,但絕對不是愛情初哥,而且每次的伴侶都是公認的靚女。第一個好像是中學時期高年級校花。第二個都是中學時期的,不過她就是比我高一年級的學姐,更是讀書尖子。第三個是音樂界的氣質古箏美女,是工作時認識的,年紀比我大一年。第四個是我的音樂粉絲,年紀比我小幾年。第五個是我的書迷,但年紀也是比我大一點。第六個...... 太多了我也記不起...... sorry man~

我比較喜歡比自己年長的女孩子,可能係我比一般男仔成熟得早,我總覺得年紀比自己小的女孩子是低B的。我唔特別鍾意打機,但小時候都會玩下 「頭文字D」,略有成就咁啦!有些場都有些世界排名,所以當時人人都叫我「車神Green少」。不過中學畢業後就卸任了,「車神」就留給年輕人吧!人大了著重的反而是工作、愛情和金錢投資。

話就話智能手機普及,但其實我連一個Game都無下載過,手機對於我來說就是工作、影相和睇女!

「喂,你無事呀嘛?」磚同學見我擺哂pose在發呆,然後用手在我眼前輕掃幾下,遂問道。

我搖一搖頭,從往事中清醒過來。

我:「無事,比返部電話你。」

磚同學:「睇你個樣呆哂咁,做咩呀?愛上衛芝雅呀?咪發夢啦...... 人地明星黎架,你下世再抬過胎先啦!」

附近突然傳來一把揶揄又乞人憎既聲音。

「搞咩呀Green少?又睇女啊?算把啦你......」那是程同學的聲音。

程同學選修科係同我一班的,是一位已經步入中年,從事地產業既四十餘歲成功男士。他因為中學時期會考成績差,但為了在地產公司向上攀升,因此報讀了毅進計劃,與我們一起成為了「毅進仔」。佢份人無乜特別,整日都是日里萬機,錢、錢和錢,人品係好但把口臭過榴槤,所以一眾女同學都是傾向我呢邊。事實證明成功有錢既男人唔一定係有女冧,最重要係以心比心,以誠待人。
米六高登仔 31日
是咁的
綠茶_君 31日
我無視著他們既說話,一臉洋洋自得。心裏卻想著:「你哋根本就唔知我係外面咩料!算啦~」

不過人哋咁諗都份屬正常既,我向來為人低調,在一般人既眼中我只係個平庸既「毅進仔」。

我決定在學校把「衛芝雅」的事情隻字不提,繼續如常上Fb和Ig睇女,久不久挑逗一下身邊那些剛DSE畢業的年輕女同學,轉移他們的視線,以隱藏自己對衛芝雅的情懷。我雖然喜歡到處留情,但一切都是「發乎情,止於禮」。我尊重愛情,更愛惜身邊一切的人和緣份。愛和喜歡是兩件事,男人可以風流,但絕不可下流。

回家後,懂得善用科技的我用手機和電腦同時搜索著有關衛芝雅的資料,看看她到底是個怎麼樣既人。右手手指在滑鼠上遊走,左手操控著電話上網,眼睛在兩個螢幕間上下移動,決心開展尋找女神之旅!待續......
綠茶_君 28日
「毅進仔」竟然和女明星談戀愛 第三章

毅進計劃畢業一年後...... 在一輛七人私家車的車廂內。

「唉...... 」一名女性在沒精打采地望著車窗嘆著氣。

這名女性驟眼看似一名輕熟女,年約三十,外表秀麗,染有一把又長又直,一睇就知啱啱有髮型師幫佢裇過既金毛秀髮,大大的眼睛配上櫻桃既小嘴,襯托在一張微圓的臉孔。粉紅色貼身的連身裙把一副健美的身材表露無遺,唔洗問都估到佢係有keep開fit既靚女。

佢好苦惱咁用隻右手托住個下巴,好似一條好靚既魚隔住塊玻璃望住外面個世界咁。突然有把矯柔少女的聲音傳過來。

「衛小姐你還好嗎?」坐在她旁邊的另一名女性問道。

「無乜野,只係...... 」嘆氣的女性欲言又止咁,搞到旁邊的女性一臉尷尬,不知如何是好。

「Fion,你叫我做Michelle就得啦!衛小姐叫到好陌生咁。」

Fion係一名年約二十出頭,剛讀完「毅進計劃」畢業的少女。她是修讀化妝,因此畢業後便找尋相關既工作,剛好佢搵到一間公司請人,而職務是負責幫女藝人化妝。她被派到女藝人「衛芝雅」既身邊工作,芝雅見Fion話頭醒尾,又聽教聽話咁款,於是索性嗌佢幫手做埋自己既私人助理,而今日係Fion第一日返工。
綠茶_君 28日
「啊...... 好的,咁...... Michelle不如我幫你補一補啲粉好嗎?」Fion問道。

「唔洗啦。」Michelle勉強地微笑著搖著頭說道。

Michelle「衛芝雅」是一名香港鷹王娛樂公司旗下的女藝人,入行已有十餘載,因衞芝雅這個名字太普通,經常同人哋撞名,娛樂界本來已有一名叫「衛芝」的女藝人,後來又黎個叫「連芝雅」既女藝人歌手,夾係中間既衛芝雅真係老尷到面都青埋。咁都未夠,重要個樣又似董杉菜(徐XX)+武則天(范XX)+富察皇后(秦X),最大鑊係連把聲都似埋馬小玲(萬XX),總之就四個字「慘無人道」。

Michelle是一個很努力的年輕人,中學畢業後便出來社會工作,做過珠寶零售,有鑑證牌,重成日一得閒就考不同既牌照和修讀不同的課程,係名符其實既「貼地」正常人。也許是呢啲原因或者是太貼地既因由,又或者係命水問題,她總是不能夠好似其他女藝人咁大紅大紫,出道十餘載,行走在街上認得出她的人廖廖可數。不過佢依然好比心機咁做好自己既工作,那怕是沒人認得。

「Michelle,你今日個樣好似心事重重咁,唔開心?」Fion好奇地問。

Michelle將個視線由玻璃窗轉返過去望住Fion,然後輕輕搖搖頭說道。

「嗱Fion,呢啲問題你係度問我好啦,平時係外面唔好隨便問啊!知道嗎?」

Fion 眉心一推,百思不得其解咁。

「如果不慎被記者聽到,到時又大造新聞了。」Michelle解釋著。

Fion 係度loading緊Michelle既說話。

「因為...... 所以...... 但是...... 如果...... 」Michelle繼續語重心長咁同Fion解釋,就好似一個大姐姐教導妹妹咁。
綠茶_君 28日
初來報到既Fion係fresh grad,剛剛出黎撈,唔識世界係好正常,所以Michelle都無怪佢,因為自己初入行個陣都係咁。Fion既天真令Michelle想返起自己n年前初入行去非洲開工個單野......

事源是咁的,個年係佢入行頭三年, 第一次去非洲做野,唔知係咪人靚就多仔冧,被個係酒店做既非洲黑人員工睇中,人哋重向佢同行既女性朋友講,想向佢求婚。開頭重以為他搲水吹,所以少不更事既Michelle就話要送3隻長頸鹿先答應同佢結婚。可惜人哋話只得3隻大象,咁就算鬼數了。返到黎香港諗住同經理人開心share啦,點知反而比人罵到趴係度。點解?因為人地d民族好講傳統文化,如果人哋真係做到你既要求,你就要嫁比人。反口既話,人哋分分鐘會好似復仇者聯盟3個黑豹咁交叉手嗌一句:「Wakanda forever!」,然後千軍萬鹿來相見,到時孫悟空都救你唔到呀! 其實識啲野既人都知非洲人既男權主義非常嚴重,對於佢哋而言,男人必須係一家之主,而女人僅僅是服務他們既人而已。所以呢啲野係唔可以隨便講,係真的!

自此經一事長一智,直到現在Michelle已經係一個成熟端莊既輕熟女,講野當然大方得體咗之餘,做事亦會三思而後行。

Fion被Michelle循循善誘咁教化完一頓之後,個樣好似霎時間明白咗啲野咁,但重係有些消化不及。

「慢慢啦,後生女。」Michelle微笑說道。

Michelle同Fion講咗少少自己既背景,以及交代咗今日工作的事情比Fion知。

從Michelle既口中,Fion意外地聽到一個名字,她表露出一副驚訝且不可思議的表情,那是她熟悉既名字...... 「Green」。待續......
綠茶_君 26日
「毅進仔」竟然和女明星談戀愛 第四章

現在:快樂不知時日過,轉眼又過咗幾日......

某日放學既晚上,我繼續我既「衛芝雅尋找之旅」。經我連日來,不眠不休、捱更抵夜、鍥而不捨、滴水穿石,再配上不屈不撓既精神同毅力,終於我對「衛芝雅」有了些基礎的認識。

作為新世代既年輕人,小時候既我已經懂得善用網上學習既優勢,搜尋全球各地美女圖片,欣賞各國風族文化。因此搜尋一個香港女藝人既資料,對於我來說絕對係easy job!

在搜尋資料既過程中,我follow了她的Facebook和Instagram,在這兩大社交平台中能夠看到好多佢自己平日上載既相片。從相片中我覺得她是一個帶著陽光氣息,而且充滿正能量既人。Follow佢ig既人其實唔算多得廿幾萬人,以全職女藝人黎講呢個數算中下。基本上一個普通既港姐、電視台二三線既女藝人或者係網紅可能都同佢咁高咁大,甚至超過佢。

我用堅苦卓絕既精神把佢個ig由頭返掃到落底,剛好正是她第一個貼文,根據佢自己所講:「Hi, Instagram」既呢個post,上載日期是二零一三年既五月二日,由此推斷佢係呢一年開始加入ig既。

至於Facebook...... 原本我都係好白痴咁打算由第一個post開始掃到落底,但掃咗成十幾分鐘都係掃到兩三年前既post,我真係掃到手指都抽筋。基於要保護與我有超友誼關係既右手既原因,所以我決定放棄......
綠茶_君 26日
我去廁所沖個靚涼,順比自己休息下,整理一下自己既思緒,然後繼續再諗,睇下有冇其他方法知道佢個Facebook係幾時開的。

點解我會咁執著呢啲問題?我又唔係做私家偵探,為何要起佢底呢?其實係因為在我查閱有關佢既資料時,我發現佢成日都在網上社交平台或記者面前自稱出街時被人認錯樣,甚至根本無人認得佢,最陰公係連網上班「高登仔」和「連登仔」都無人討論佢。對一個藝人來說,被人認錯或者沒有人認得其實心裏是很難受的,如果連討論你或負評你既人都無,個種感覺重慘過食檸檬。

我看過幾段有關她的自我回顧短片「紀錄·十年」,她親口講述自己入行既經歷,睇見佢講起往事眼濕濕咁,我其實係有點兒感動的。雖然唔知內容係真定假,但我就選擇相信了。因為藝人也是人,只是平日在鏡頭下工作而已。計起上來,身兼小說作家、工藝師同音樂家既我,嚴格來說都算得上是半個藝人,只是曝光率沒有她這麽多而已。

好啦,講到老鏈咁遠,係時候講返正題。就係......我想幫佢搵出原因,「點解佢唔紅!」

唔知係我娘親既功勞定係我後天既努力,聰明既我唔洗靠多啦A夢都諗到個好方法。「睇佢第一張個人大頭相係幾時post既!」

果然沖涼時thinking係最好既時候,因為血氣運行全身,爆哂我啲小宇宙出來。

開返部電腦,check返「衛芝雅」個Facebook專頁,果然真係比我搵到。

「二零一零年二月九日。」我凝視著個mon喃喃自語。
綠茶_君 26日
根據我當時眼見既資料,佢Facebook專頁只有九萬幾個人like,與ig個數相比確實差好遠。但Facebook能夠看到她很多不同的工作和日常生活資訊,而內容比ig的更豐富。

不過最搞笑既係...... 其實佢個Youtube Channel只是開了不久,以現在我眼看見開始計算,一年也不足夠。

我心想:「唔係掛,出道十年有多,竟然而家先有Youtube Channel?」

咁都不單止,上載的影片數量更是寥寥可數。訂閱人數只得一萬人左右,簡直少得可憐。

嗯...... 這一刻我好像明白了些什麼。

當中或者有些別的因由,是我們不知道的。但我也不管了,因為我已經被她的魅力吸引了!所以我按下了訂閱,雖然可能微不足道,但我深信「積少成多」的道理,亦希望比多一份支持佢。

我唔係她的粉絲,更唔係一個痴漢,我只是一個單純地喜歡美麗的人,對於一切的美麗我都想擁抱著。想做就做,想愛就愛!

月黑風高、萬籟俱寂既晚上,我屋企外面其實就無乜人,最多係聽到少少海浪聲。但頑皮既手機就響個不停,全部都是學校的功課群組發過來的信息。作為好學生既我當然無視著同學們的呼喚,做個稱職的已讀不回潛水組員。因為此時此刻的我腦子裏萌生了一個很壞又很大膽的想法!就是......

「我要跟衛芝雅談戀愛!」我以歡暢的聲音大聲叫出來,好像要讓整個西貢都要知道一樣。聲音傳到遼闊的海平面上,海浪既拍打聲彷彿回應著我,給我鼓勵一樣。我終於找到生命的刺激!我要實行我既溝女大計了,想知點追明星?Lm學野啦~待續......
綠茶_君 25日
「毅進仔」竟然和女明星談戀愛廣播劇版 第一章 (適合唔鍾意睇字既巴打)

https://www.youtube.com/watch?v=t9luabWEjoE
綠茶_君 25日
「毅進仔」竟然和女明星談戀愛廣播劇版 第二章 (適合唔鍾意睇字既巴打)

https://www.youtube.com/watch?v=Nnfk6CK0qsc
綠茶_君 23日
「毅進仔」竟然和女明星談戀愛 第五章

翌日,我如常返學。

雖然我已經投身社會工作多年,但我依然嚮往讀書的時光。「毅進計劃」是主要幫助一些DSE差一啲,又或者是以前舊會考制度無五科合格既人。對於成績欠佳但又有心升學既人來說,毅進可以話係一條橋樑。

過去既我曾經在會考後,入讀過香港某間藝術學院,在學歷上早已不需再修讀毅進。但有心想讀3D設計和航拍的我,看見外面獨立讀一個課程是很貴的。雖然我係有啲米,但「貼地」既我一定會拎部FX-50F出黎計下個算術平均回報率。我了解過毅進課程既內容、上課既地點和車資等等,神指屈算計過條數之後,都係覺得讀一個完整既課程係抵過散買。

對錢有敏銳觸覺既我,二話不說已經去報名了。
當興趣班上堂既我,當然比其他同學來得無壓力之餘,而且還有閒情逸致去溝女。

除了數學和3D航拍堂外,每逢上中文、英文、通識和人際傳意課時,我都會專心一意地的了解「衛芝雅」既資料及留意她的最新動態。為咗掩飾自己上堂專心睇女,我特意由原來既後座位置搬上最前面,因為老師既眼睛通常只會注視班房後面既同學。而且我把手機既亮度調到最低,並戴上免提耳機,方便隨時觀看及收聽Michelle既即時動態。

好幾年無拍拖,在無愛情滋潤下既我,突然春心蕩漾咁款,好快就比我個好友-磚同學發現了。

係旁人既眼中一般會覺得明星只會跟圈中人,或者是有錢人談戀愛。但我想法正與佢哋剛剛相反。我既自信話我知,這個世界只要你願意做的話,你已經成功咗一半,坐係度等運到既話你就注定失敗。

係班裏面,磚同學係同我最交心的一個,所以我決定分享我既「大計」比佢知。

那天...... 月白風清既晚上,海面波光粼粼,我同磚同學放學後食完晚飯經過西九龍站對出既戲劇文化中心。有陣唔知點形容既海水味傳入我敏銳既嗅覺中,個陣海風吹到我個髮型都亂哂,然後我哋停下腳步欣賞下香港既景色,好型咁望住個海傾計。

「喂,到底單野係點既唧?」磚同學一臉好奇既樣問道。

「呢..... 上次我話好正好吸引到我個個呀...... 」我吞吞吐吐咁答佢。

「邊個啊?你個個都話正架啦!係咪Fion啊?」磚同學單起隻眼,樣衰衰咁問。

「Fion?梗係唔係啦,佢太細個啦!」我即刻灑手擰頭。

「唔...... 唔通係伍姑娘?」磚同學再猜。
綠茶_君 23日
伍姑娘全名伍詠詠,英文名叫「啊Wing」,係我哋C班既成績優異模範生。樣貌與徐子珊有幾分相似,跟我們班的程同學非常相熟,因名字與伍永薇相似,因此得名「伍姑娘」。

「唉...... 伍姑娘係叔叔架!」我輕聲嘆氣回答著。

「叔叔」是程同學的另一個名字,也是我和磚同學私下對他的稱呼。

「唔係Fion,又唔係伍姑娘,唔通係...... A班個班花BoBo?」磚同學再猜。

「不,雖然BoBo係幾靚,但未夠氣質。」我豎起一隻手指fing左fing右,一臉洋洋自得。

「咁係邊個呀,妖!」磚同學終於按耐不住自己粗言穢語,準備向我發動聖戰。

「係Michelle!」我凜然咁講出Michelle個名,一陣唔識點形容有陣味既海風順斜而下咁吹動我既髮絲。

「Michelle?我哋班有個女仔叫呢個名咩?定係A,B班既?」磚同學一臉疑惑。

我攝隻手入褲袋,拎出我部過時已久既S6三星手機,開「衛芝雅」個ig比磚同學睇。

「吓...... 你發神經呀?」磚同學塊面話比我知佢好驚訝詫異。

「嗯!」我好型咁嗯咗一聲。

「咪傻啦,雖然人哋而家單身,但人哋係明星黎架,點會睇得上你呀?而且你根本無機會埋到佢身邊,點識人啊?咪咁離地啦!」磚同學一輪嘴咁否定我既戀人目標。

「如果我話有機會呢?」我自信地回答佢。

我係我件外套既暗袋拎咗個銀色既咭片盒出來,抽咗一張咭片比磚同學。

「吓...... 原來你係...... 」

磚同學塊面流露出一副不可思議既表情,此時既我深呼吸了一口氣,擰轉身挺直胸膛,用個背脊得住佢,欣賞著維港兩岸既景色,讓磚同學景仰著我高大既身影,沉思在我秘密的身份中。待續......
綠茶_君 22日
毅進仔」竟然和女明星談戀愛廣播劇版 第三章 (適合唔鍾意睇字既巴打)

https://www.youtube.com/watch?v=jGh--xScXRU
綠茶_君 19日
「毅進仔」竟然和女明星談戀愛廣播劇版 第四章 (適合唔鍾意睇字既巴打)

https://www.youtube.com/watch?v=GqDHuBxsI7Y
菲尼斯人 19日
竟然玩埋廣播劇#adore# [sosad] [sosad]
Walcott_的錯 19日
警犬預備軍xx(
旅遊達人 19日
kids Tommy 會考0分
婜了靚模
應屆會孝生 19日
#good#
人情公價幾多 7日
睇到毅進兩隻字已經唔洗睇落去 :o)
跳到頁尾